أحمد شوبير يهاجم أحمد حسن والحضري: "ولا بيهمني عميد ولا صول"

رد الإعلامي أحمد شوبير على هجوم عصام الحضري، مدرب حراس مرمى منتخب مصر المشارك في كأس العرب، وأحمد حسن، مدير المنتخب.

وكان شوبير قد انتقد ما قام به الحضري وأحمد حسن، بالأمس، بعدما نشر الأول مقطع فيديو مع الثاني، وصفه بـ «العميد الأصلي»، ما جعل البعض يعتبر الأمر فيه إشارة إلى حسام حسن، مدرب المنتخب الأول.

ورد الحضري وأحمد حسن على ما قاله شوبير، بانتقادات عبر حسابات كل منهما الشخصية على منصات التواصل الاجتماعي.

كما أصدر اتحاد الكرة، برئاسة هاني أبوريدة، بيانًا، حذر خلاله التعامل مع السوشيال ميديا، وطالب الجميع بدعم المنتخب.

وقال شوبير عبر قناة الأهلي: «مش بيهمني الأسماء ده عميد ده صول ده أسطورة ده دحدورة أنا يهمني منتخب مصر الوطني».

وأضاف: «عندنا مباراة بعدها مباراة يوصلونا لكأس العالم، مش شغلتي إن في ناس نفسها إن المنتخب ميوصلش عشان مشاركوش ومراحوش».

وأكمل: «أنا أتمنى أن المنتخب يوصل إذا كنت وطني ومخلص أو لاعب قلبك على منتخبك ومدربين وزملائك هو ده الصح».

وتابع: «ده اللي أنا قولته امبارح دون ذكر أسماء، أسهل حاجة تطلع تكتب هنا وتقول اللي قولته في منتهى الأدب والاحترام، عندنا أسبوع نوصل فيه لكأس العالم ساندوا فيه الجهاز الفني، عاجبك مش عاجبك. ساند المنظومة كلها».

وزاد: «خصوصًا إنك شريك في هذه المنظومة ما هو الخطأ. في ناس الجهل واخدها لهذه الدرجة هو أنا القط بتاعي جمل؟ هو في إيه ياعم هو أنا فاضي أرد على ده وده، في حاجة اسمها تجاهل وهتتحاور مع مين وليه، يا جماعة الخير اصبروا أسبوع نعدي كأس العالم وبعدين هزر براحتك، ليه بناكل في بعض كدة».

كما أضاف: «مستني بقى تكتب وأكتب وأرد عليك وترد على، ولا هرد عليك ولا هعبرك، لكن أنا هعبر منتخب بلدي، وكمان بتقولي صباح الخير مفيش صباح الخير، وكمان هتجرجرنا لخناقة، ده محدش بيجيب سيرتكم ولا اسمكم».

وفي وقت سابق، أثار الإعلامي أحمد شوبير، الجدل برسالة غامضة عبر حسابه الرسمي بموقع التواصل الاجتماعي.

وكتب أحمد شوبير، عبر حسابه الشخصية بموقع التواصل الاجتماعي "فيس بوك": "دايما افتكر لا تجادل جاهل"، دون توضيح السبب.

وكان أحمد حسن مدير منتخب المحليين، انتقد تصريحات أحمد شوبير، التي لمح خلالها، بوجود أزمة بين الجهاز الفني للمنتخب الأول بقيادة حسام حسن، ومنتخب المحليين بقيادة حلمي طولان.

وكتب أحمد حسن على صفحته الرسمية على "فيسبوك": "الكابتن شوبير طالع يدينا نصيحة على الهواء وردي هيكون هنا على الهواء، لو حابب تتطوع بنصيحة فأكيد رقم تليفوني معاك وكمان أرقام السادة المحترمين في اتحاد الكرة المصري، ولو كانت النصيحة صادقة ولوجه الله أكيد نتقبلها ونشكرك كمان، لكن طالما الكلام على الهواء فالرد هيكون على شوبير هنا على الهواء".

وأضاف: "لمعلوماتك أنا أعمل مديراً لمنتخب مصر المشارك في البطولة العربية (بتكليف ومتطوعا دون أجر) في محاولة لرد جزء للمكان الذي صنع اسمي وتاريخي، كلاعب أنهى مسيرته بلقب عميد لاعبي العالم أما بالنسبة لقصة هزاري أنا وعصام الحضري في القصة دي فهو أمر معتاد من سنين والجميع يراه ويشاهده، ولم نراك يا كابتن يا كبير يوما تنصح أو تعترض ولكن طبعاً كلنا فاهمين دفاعك بقوة واستماتة واعتراضك ليه".

واختتم: "كابتن اهدى شوية ونصيحتي ليك ركز في شغلك انت بس ووفر نصايحك لحاجة تانية علشان الموضوع مش مستحمل فتن وخناقات جديدة وكفاية اللي بنشوفه وبيحصل كل يوم وانت سيد العارفين".